Një rrugë më e shpejtë për të ngritur zërin

Ndërtesa e trashëgimisë qëndron krenare mbi kodrën e qytetit të vjetër dhe, ndërsa hyjmë në korridorin e Agjencisë për Parandalimin e Korrupsionit, një dosje kalon shpejt nga një koleg te tjetri. Shkëmbimi është i shkurtër, pothuajse rutinë. Megjithatë, pas momenteve të tilla qëndron puna e përditshme për forcimin e integritetit dhe llogaridhënies, e cila gjithnjë e më shumë nis jo te dera e zyrës, por online.

Për Bleona Krasniqin, Zyrtare e Lartë për Standardizim dhe Marrëdhënie Ndërkombëtare, transformimi është bërë i dukshëm në mënyrën se si njerëzit i drejtohen institucionit.

“Njerëzit nuk kanë më nevojë të vijnë fizikisht në zyrë për të raportuar shqetësime,” shpjegon ajo. “Ata mund të paraqesin një raport online, të marrin një numër rasti dhe ta ndjekin procesin. Kjo transparencë bën dallim. Ky automatizim na mundëson të jemi më efikas, duke i kushtuar më shumë kohë secilit rast.”

Platforma digjitale e raportimit, e mbështetur nga Programi i Kombeve të Bashkuara për Zhvillim, është krijuar për ta bërë raportimin më të thjeshtë, më të shpejtë dhe më të strukturuar. Ajo u mundëson individëve të paraqesin informata që lidhen me disa kategori, përfshirë sinjalizimin, çështjet e deklarimit të pasurisë dhe rastet e konfliktit të interesit. Në prapavijë, ajo funksionon si një sistem i plotë për menaxhimin e rasteve, duke i ndihmuar stafin që t’i organizojë dhe shqyrtojë raportet në mënyrë më efikase.

Brenda zyrave të agjencisë, ekranet tani zëvendësojnë grumbujt e dokumenteve në letër. Raportet regjistrohen në mënyrë digjitale dhe caktohen në kategorinë përkatëse. Që nga prezantimi i platformës, qindra raporte janë përpunuar përmes sistemit. Përdoruesit e jashtëm mund t’i qasen platformës përmes https://raporto.rks-gov.net/ 

Për Milot Shalën, Udhëheqës i Divizionit për Sinjalizim, teknologjia e ka ndihmuar ekipin të përqendrohet te ajo që ka më shumë rëndësi: shqyrtimi i kujdesshëm i informatave dhe sigurimi që ato të arrijnë në vendin e duhur.

“Sistemi është i shpejtë dhe i strukturuar,” thotë Shala. “Kur arrin një raportim, ne mund t’i shohim menjëherë detajet dhe të përcaktojmë se si duhet të trajtohet.”

Ndonjëherë njerëzit që paraqesin një raportim nuk janë të sigurt se cilës kategori i përket ai. Kjo nuk paraqet problem, shpjegon Shala.

“Nëse një raportim paraqitet nën tipologjinë e gabuar, ne mund ta referojmë atë brenda institucionit te kategoria e duhur,” thotë ai. “Qëllimi është të sigurohet që informata të arrijë te ekipi i duhur, në mënyrë që të ndërmerren hapat e duhur.”

Kjo fleksibilitet siguron që njerëzit të mos kenë nevojë t’i kuptojnë procedurat institucionale përpara se të vendosin të ngrenë zërin. Platforma ndihmon në kapërcimin e këtij hendeku.

Për Krasniqin, sistemi digjital nuk ka të bëjë vetëm me efikasitetin. Ai ka të bëjë edhe me ndërtimin e besimit.

“Kur njerëzit e dinë se mund të paraqesin një raportim në mënyrë të sigurt, të marrin një numër reference dhe ta ndjekin rastin e tyre, ata ndiejnë se procesi është real,” thotë ajo. “Kjo tregon se shqetësimi i tyre po merret seriozisht.”

Qasshmëria po bëhet gjithashtu një fokus kyç. Krasniqi thekson se institucioni u shërben një game të gjerë njerëzish, përfshirë personat me aftësi të kufizuara, dhe se përmirësimi i qasjes digjitale është pjesë e fazës së ardhshme të zhvillimit.

“Duam që platforma online të jetë po aq e qasshme sa raportimi me prani fizike,” thotë ajo. “Të gjithë duhet të kenë të njëjtën mundësi për të raportuar shqetësime.”

Sërish në korridor, ku kolegët shkëmbejnë dokumente dhe përditësime të shpejta, atmosfera pasqyron ritmin e një sistemi që është bërë më i shpejtë dhe më i koordinuar. Raportimet vijnë në mënyrë digjitale, kategorizohen shpejt dhe mund të ndiqen gjatë gjithë procesit.

Për Shalën, ndryshimi e ka thjeshtuar punën e përditshme.

“Funksionon shpejt dhe kjo na mundëson të përqendrohemi në shqyrtimin e vetë rasteve,” thotë ai.

Për Krasniqin, platforma përfaqëson diçka më të thellë se modernizimi. Ajo është një hap drejt bërjes së llogaridhënies më të qasshme për të gjithë.

“Kur njerëzit ndiejnë se mund të raportojnë shqetësime lehtësisht dhe shohin se procesi ecën përpara,” thotë ajo, “atëherë rritet besimi.”

Dhe ndonjëherë, ky besim nis me diçka të thjeshtë: një raportim të paraqitur online, një numër rasti të gjeneruar dhe një ekip të gatshëm për ta ndjekur deri në fund.

Platforma digjitale e raportimit është zhvilluar me mbështetjen e UNDP-së, përmes projektit “Partneritetet për OZHQ-të mbi Transparencën dhe Llogaridhënien”. Programi i Partneriteteve për OZHQ-të është iniciativa kryesore e Qendrës për Politika të UNDP-së në Seul (USPC), që synon të ndajë praktika inovative, të testuara dhe të dëshmuara, si dhe mjete politikash të Republikës së Koresë përmes rrjetit global të UNDP-së. Përmes projektit, Agjencisë për Parandalimin e Korrupsionit i është ofruar zgjidhja digjitale, si dhe këshillimi ndërmjet kolegëve nga Komisioni Kundër Korrupsionit dhe për të Drejtat Civile i Republikës së Koresë (ACRC). I zbatuar nga viti 2023 deri në vitin 2025, me mbështetjen e Republikës së Koresë, projekti ka kontribuar në qeverisje më gjithëpërfshirëse, transparente dhe llogaridhënëse, në dobi të publikut në Kosovë.