Çfarë është vaksina AstraZeneca?

Si vepron vaksina AstraZeneca?

Vaksina AstraZeneca vepron duke aktivizuar sistemin imunitar kundër COVID-19. Vaksina është e krijuar nga një virus tjetër (adenovirus) i cili është modifikuar në atë mënyrë që të krijojë antitrupa kundër virusit SARS-CoV-2. Kjo në mënyrë që, nëse në të ardhmen personi i vaksinuar bie në kontakt me virusin, organizmi të jetë i përgatitur që ta luftojë atë.

Vaksina AstraZeneca nuk përmban virusin SARS-CoV-2 dhe në asnjë mënyrë nuk mund të shkaktojë sëmundjen COVID-19.

Si administrohet AstraZeneca?

Vaksina AstraZeneca administrohet në dy doza (secila me nga 0.5 ml), të cilat ipen në muskulin e pjesës së sipërme të krahut. Doza e dytë ipet 4 deri në 12 javë pas dozës së parë.

Cila është efektshmëria e vaksinës AstraZeneca kundër COVID-19?

Rezultatet e kombinuara të katër studimeve klinike të realizuara në Mbretërinë e Bashkuar, Brazil dhe Afrikë Jugore tregojnë së vaksina AstraZeneca është e sigurt dhe efektive kundër COVID-19. Në studimet klinike, numri i rasteve simptomatike me COVID-19 ishte për 59.5% më i vogël te grupi i personave që janë vaksinuar me vaksinën AstraZeneca. Kjo nënkupton se efikasiteti i vaksinës është rreth 60%. Për më tepër, rezultatet e studimeve tregojnë se efikasiteti i vaksinës AstraZeneca ndaj simptomave të rënda të sëmundjes COVID-19 është edhe më i madh – afër 100%

Cilat janë efektet anësore të vaksinës AstraZeneca?

Si të gjitha vaksinat e tjera, edhe vaksina AstraZeneca mund të shkaktojë efekte anësore te disa njerëz. Shumica e efekteve anësore janë të natyrës së lehtë dhe kalojnë brenda pak ditësh. Efektet e raportuara më së shpeshti janë: dhimbje dhe ndjeshmëri e shtuar në vendin e injektimit, ndjenjë e lodhjes, ethe, temperaturë dhe dhimbje e muskujve. 1 në 10 persona të vaksinuar raportojnë efekte të tilla anësore. Në raste shumë të rralla pas vaksinimit mund të paraqiten reaksione alergjike. Ashtu si për çdo vaksinë tjetër, edhe AstraZeneca duhet të administrohet nën mbikëqyrjen e profesionistit shëndetësor dhe me mjetet e duhura për trajtim të reaksioneve alergjike

A duhet ta marr vaksinën nëse e kam kaluar COVID-19?

Të gjithë personat e moshës mbi 18 vjeç rekomandohet që ta marrin vaksinën, edhe nëse tashmë e kanë kaluar COVID-19. Të dhënat e studimeve klinike tregojnë se vaksina nuk ka ndonjë efeket anësor shtesë te personat që e kanë kaluar COVID-19.

Cfarë duhet të bëj nëse nuk ndihem mirë në kohën e terminit për vaksinim?

Nëse nuk ndjeheni mirë në kohën e terminit për vaksinim, rekomandohet që të prisni për marrjen e vaksinës derisa të shëroheni plotësisht. Nuk duhet të shkoni në termin vaksine nëse jeni në vetizolim, jeni duke pritur testin për COVID-19, ose nëse nuk jeni të sigurt nëse jeni në gjendje të mirë shëndetësore.

A është e mundshme që ta infektoj dikë me COVID-19 pasi ta kem marrë vaksinën?

Dy doza të vaksinës do t’i zvogëlojnë ndjeshëm gjasat që të sëmureni rëndë nga COVID-19. Ende nuk dihet nëse vaksina do të ju mbrojë nga infektimi dhe shpërndarja e virusit. Prandaj, është e rëndësishme t’u përmbaheni masave parandaluese për t’i mbrojtur të tjerët.

Për ta mbrojtur veten dhe rrethin tuaj, edhe pas vaksinimit ju duhet që:

• ta mbani distancën fizike

• ta mbani maskën

• t’i pastroni duart me kujdes dhe shpesh

A duhet vaksinuar gratë shtatzëna dhe lehonat?

Të dhënat lidhur me efektet e vaksinës AstraZeneca te gratë shtatzëna dhe nënat të cilat ushqejnë foshnjat me gji janë të limituara. Kësisoj, vendimi për t’u vaksinuar ose jo duhet te merret në konsultim me mjekun pas vlerësimit të rreziqeve dhe përfitimeve të vaksinës.

A është mpiksja e gjakut efekt anësor i vaksinës AstraZeneca?

Autoritetet rregullative të barnave në disa vende të Evropës kanë pranuar raportime për raste të mpiksjes së gjakut te disa persona që paraprakisht kanë marrë vaksinën AstraZeneca. Sidoqoftë, Agjencia Evropiane e Barnave – EMA në rishikimin preliminar të të dhënave lidhur me këto raste, ka konkluduar se nuk ka lidhshmëri mes vaksinës AstraZeneca dhe mpiksjes së gjakut, dhe se këto raste nuk janë shkaktuar nga vaksina. Sipas EMA-s – i cili është autoriteti më i lartë rregullator për produkte medicinale në Bashkimin Evropian – përfitimet e vaksinës AstraZeneca vazhdojnë t’i tejkalojnë rrëziqet apo efektet anësore që mund të shfaqen.