Zyra e koordinatorit zhvillimor
Koordinatori për Zhvillim i Kombeve të Bashkuara në Kosovë
Sekretari i Përgjithshëm i Kombeve të Bashkuara, António Guterres, emëroi Stephen O’Malley nga Kanadaja si Koordinator për Zhvillim i Kombeve të Bashkuara në Kosovë. Ai mori detyrën më 2 gusht, 2025.
Z. O’Malley ka mbi 25 vjet përvojë në punën humanitare dhe zhvillimore. Së fundmi, ai shërbeu si Koordinator i Përhershëm ad interim i Kombeve të Bashkuara në Kazakistan nga nëntori 2024 deri në qershor 2025.
Përpara kësaj, ai ishte Drejtor i Projektit Peer-2-Peer, një nismë e Grupit të Drejtorëve të Emergjencave të Komitetit Ndërinstitucional të Përhershëm, e cila ofron mbështetje mes kolegësh për koordinatorët humanitarë dhe ekipet humanitare vendore. Në të njëjtën kohë, ai shërbeu si Zëvendësdrejtor i përkohshëm për Afrikën I në Divizionin e Operacioneve dhe Avokatisë të Zyrës për Koordinimin e Çështjeve Humanitare (OCHA), dhe më parë si Zëvendësdrejtor i përkohshëm për Azinë dhe Paqësorin, Evropën dhe Amerikën Latine dhe Karaibet.
Z. O’Malley ka mbajtur edhe pozita të tjera udhëheqëse në OCHA, përfshirë Shef i Zyrës së OCHA në Sudanin Jugor. Ai ka qenë gjithashtu Shef i Ekipit për COVID-19, Zëvendësdrejtor i Divizionit për Koordinim dhe Reagim, si dhe Shef i Sekretariatit të Fondit Qendror për Reagim Emergjent në Nju Jork. Nga gushti 2013 deri në gusht 2018, ai ishte Koordinator i Përhershëm i Kombeve të Bashkuara dhe Përfaqësues i Përhershëm i Programit të Kombeve të Bashkuara për Zhvillim (UNDP) për Barbadosin dhe Organizatat e Shteteve të Karaibeve Lindore.
Para se t’i bashkohej Kombeve të Bashkuara, z. O’Malley punoi me organizatën joqeveritare Médecins Sans Frontières në Afrikë, Evropë dhe Amerikën e Veriut. Ai e filloi karrierën në sektorin privat me kompaninë Decima Research në Toronto, Kanada.
Ai ka një Master në Marrëdhënie Ndërkombëtare nga Shkolla për Çështje Ndërkombëtare dhe Publike në Universitetin Columbia në SHBA, një Master në Studime Politike, si dhe një Diplomë Bachelor në Tregti (me nderime) nga Universiteti Queen’s në Kanada.
Ai është i martuar dhe ka dy vajza.
