OKB në Kosovë

Referencat ndaj Kosovës në këtë sajt duhet të kuptohen në kontekstin e rezolutës 1244 (1999) të Këshillit të Sigurimit.

Prania e Kombeve të Bashkuara në Kosovë daton që nga viti 1999, kur Këshilli i Sigurimit themeloi Misionin e Administratës së Përkohshme të Kombeve të Bashkuara në Kosovë (UNMIK) përmes Rezolutës 1244 (1999) të Këshillit të Sigurimit. Më shumë informata rreth UNMIK-ut, mandatit dhe aktiviteteve të tij aktuale janë në dispozicion në faqen e internetit të UNMIK-ut.

UNKT-ja dhe UNMIK-u bashkëpunojnë ngushtë për përmirësimin e jetës së të gjithë banorëve të Kosovës.

Ekipi i Kombeve të Bashkuara në Kosovë (UNKT) bashkon agjencitë, fondet dhe programet e Kombeve të Bashkuara që veprojnë në Kosovë. Nën koordinimin e Koordinatorit të Kombeve të Bashkuara për Zhvillim, ekipi ndërthur njohuritë, mandatet dhe burimet e tij për të mbështetur zhvillimin e qëndrueshëm, të drejtat e njeriut, barazinë dhe qëndrueshmërinë.

UNKT-ja bashkëpunon me institucionet, komunat, shoqërinë civile, komunitetet, partnerët për zhvillim, institucionet financiare ndërkombëtare, akademinë dhe sektorin privat. Së bashku, ata kontribuojnë në arritjen e Objektivave të Zhvillimit të Qëndrueshëm.

Kjo punë udhëhiqet nga të drejtat e njeriut, barazia gjinore, përfshirja e personave me aftësi të kufizuara, fuqizimi i të rinjve, llogaridhënia dhe zotimi për të mos lënë askënd pas.

Foto: © UN Kosovo Team

Plani Strategjik i UNKT-së për Zhvillim të Qëndrueshëm 2026–2030

Plani Strategjik i UNKT-së për Zhvillim të Qëndrueshëm 2026–2030 përcakton kontributin e përbashkët të Kombeve të Bashkuara ndaj prioriteteve zhvillimore të Kosovës gjatë një periudhe pesëvjeçare.

Ai është hartuar mbi bazën e Analizës së Përbashkët për Kosovën dhe konsultimeve me institucionet, shoqërinë civile, gratë dhe të rinjtë, komunitetet joshumicë, organizatat e personave me aftësi të kufizuara, komunitetet rurale, personat në lëvizje, sektorin privat dhe partnerët për zhvillim.

Analiza vë në pah sfida të vazhdueshme. Këto përfshijnë qasjen e pabarabartë në arsim, kujdes shëndetësor, shërbime të kujdesit dhe mbrojtje sociale; përjashtimin nga tregu i punës; mangësitë në kapacitetet e sektorit publik dhe qasjen në drejtësi; pabarazinë gjinore; ndryshimet demografike; si dhe rreziqet në rritje mjedisore dhe klimatike.

Plani Strategjik u përgjigjet këtyre sfidave përmes tri Fushave Prioritare të ndërlidhura. Së bashku, ato synojnë të përmirësojnë mundësitë për njerëzit, të fuqizojnë sistemet publike dhe të mbështesin një ekonomi më të gjelbër dhe më gjithëpërfshirëse.

Një qasje e integruar

Tri Fushat Prioritare përforcojnë njëra-tjetrën. Arsimi, shëndetësia dhe mbrojtja sociale më e mirë u ndihmojnë njerëzve të marrin pjesë në shoqëri dhe ekonomi. Institucionet llogaridhënëse dhe qasja në drejtësi ndërtojnë besimin dhe përmirësojnë shërbimet publike. Rritja ekonomike gjithëpërfshirëse krijon mundësi dhe forcon qëndrueshmërinë.

Të drejtat e njeriut, barazia gjinore, përfshirja e të rinjve dhe e personave me aftësi të kufizuara, migracioni, transformimi digjital dhe pjesëmarrja e shoqërisë civile integrohen në të gjitha fushat e punës.

UNKT-ja ndërthur këshillimin për politika, mbështetjen teknike, zhvillimin e kapaciteteve dhe veprimin në nivel komuniteti. Ajo gjithashtu ndihmon në gjenerimin e dëshmive, përmirësimin e përdorimit të të dhënave, testimin e qasjeve të reja dhe zgjerimin e zgjidhjeve që sjellin rezultate.

Zbatimi i koordinuar dhe llogaridhënia

Plani Strategjik zbatohet nën koordinimin e përgjithshëm të Koordinatorit të Kombeve të Bashkuara për Zhvillim.

Tri Grupe të Rezultateve, nga një për secilën Fushë Prioritare, koordinojnë zbatimin dhe identifikojnë mundësitë për programim të përbashkët. Ato mbështeten nga mekanizma në nivel të gjithë sistemit që mbulojnë monitorimin dhe vlerësimin, të drejtat e njeriut, barazinë gjinore, migracionin, operacionet, komunikimin dhe avokimin.

Planet e Përbashkëta Vjetore të Punës përcaktojnë veprimet, përgjegjësitë, afatet kohore dhe burimet për të cilat është rënë dakord. Ato rishikohen rregullisht në mënyrë që UNKT-ja të mund t'u përgjigjet dëshmive të reja, nevojave në ndryshim dhe rreziqeve në zhvillim.

Progresi matet kundrejt treguesve, vlerave bazë dhe caqeve të dakorduara. Rezultatet paraqiten në një Raport të vetëm Vjetor të Rezultateve të Ekipit të Kombeve të Bashkuara në Kosovë, duke u ofruar partnerëve dhe publikut një pasqyrë të qartë të progresit, sfidave, burimeve dhe mësimeve të nxjerra.

Një vlerësim i pavarur zhvillohet në vitin 2029 për të vlerësuar rëndësinë, koherencën, efektivitetin, efikasitetin dhe qëndrueshmërinë e kontributit të

Partneritetet dhe financimi

Partneritetet janë thelbësore për zbatimin e Planit Strategjik. UNKT-ja bashkëpunon me institucionet dhe komunat, shoqërinë civile, komunitetet, partnerët për zhvillim, institucionet financiare ndërkombëtare, akademinë, mediat dhe sektorin privat.

Mobilizimi i burimeve fokusohet në angazhimin e koordinuar me donatorët, programet e përbashkëta, financimin e përbashkuar dhe bashkëfinancimin. Planifikimi dhe raportimi i përbashkët ndihmojnë në zvogëlimin e duplikimit, përmirësimin e transparencës dhe demonstrimin e vlerës së shtuar që sjell puna e Kombeve të Bashkuara si një ekip i vetëm.

Përmes ekspertizës së përbashkët, rolit të saj si platformë bashkuese dhe përkushtimit ndaj të drejtave të njeriut, UNKT-ja mbetet një partner i besueshëm dhe i koordinuar — duke lidhur njerëzit, institucionet, njohuritë dhe financimin për të arritur rezultate të qëndrueshme për të gjithë njerëzit në Kosovë.

Fushat prioritare

1

Zhvillimi i kapitalit njerëzor

 

Deri në vitin 2030, njerëzit në Kosovë përfitojnë nga investime të shtuara dhe të qëndrueshme në zhvillimin e kapitalit njerëzor, me theks të veçantë në fuqizimin e grave, cilësinë e kujdesit dhe mbrojtjen sociale.

UNKT-ja do të mbështesë sisteme më gjithëpërfshirëse të arsimit, shëndetësisë, kujdesit dhe mbrojtjes sociale. Fokusi do të jetë në shërbime dhe mundësi më të mira gjatë gjithë jetës së njerëzve, veçanërisht për gratë dhe vajzat, fëmijët, të rinjtë, personat me aftësi të kufizuara, personat e moshuar, komunitetet joshumicë dhe njerëzit që jetojnë në zona me qasje të pamjaftueshme në shërbime.

2

Qeverisja llogaridhënëse, sundimi i ligjit dhe kohezioni social

 

Deri në vitin 2030, njerëzit në Kosovë përfitojnë nga një qeverisje llogaridhënëse dhe e përgjegjshme ndaj çështjeve gjinore, si dhe nga një kohezion social i fuqizuar, pa diskriminim.

UNKT-ja do të ndihmojë në forcimin e institucioneve transparente, qasjes në drejtësi, të drejtave të njeriut dhe pjesëmarrjes publike. Ajo gjithashtu do të mbështesë dialogun, besimin dhe bashkëpunimin ndërmjet komuniteteve, me vëmendje të veçantë ndaj njerëzve që përballen me diskriminim ose pengesa në qasjen në shërbime dhe në proceset e vendimmarrjes.

3

Zhvillimi i qëndrueshëm ekonomik

 

Deri në vitin 2030, njerëzit në Kosovë përfitojnë nga puna e denjë, barazia gjinore dhe zhvillimi i gjelbër ekonomik, i cili forcon qëndrueshmërinë ndaj ndryshimeve klimatike.

UNKT-ja do të mbështesë punën e denjë, ndërmarrësinë gjithëpërfshirëse dhe një tranzicion të drejtë drejt një ekonomie më të gjelbër. Përpjekjet e përbashkëta do të promovojnë zhvillimin e aftësive, inovacionin, bujqësinë e qëndrueshme, biznesin e përgjegjshëm, veprimin për klimën dhe qasje më të mirë në mundësi ekonomike, veçanërisht për gratë, të rinjtë dhe grupet në rrezik të përjashtimit.

1 / 3

Objektivat e Zhvillimit të Qëndrueshëm në Kosovë

Objektivat e Zhvillimit të Qëndrueshëm janë një thirrje globale për veprim për t'i dhënë fund varfërisë, për të mbrojtur mjedisin dhe klimën e tokës dhe për të siguruar që njerëzit kudo që janë të mund të gëzojnë paqe dhe prosperitet. Këto janë qëllimet për të cilat OKB po punon në Kosovë: