Historitë tona. Zbuloni më shumë rreth punës sonë drejt Objektivave të Zhvillimit të Qëndrueshëm.

Njerëzit dhe partneritetet që qëndrojnë pas punës së Kombeve të Bashkuara në Kosovë ishin në qendër të një ekspozite publike fotografike, të mbajtur të hënën në sheshin “Zahir Pajaziti”, me rastin e Ditës së Kombeve të Bashkuara.E organizuar bashkërisht nga UNMIK-u dhe Ekipi i OKB-së në Kosovë, ekspozita përfshiu kontribute nga e gjithë familja e OKB-së. Tridhjetë e dy portrete, të shoqëruara me përshkrime të shkurtra, pasqyruan përvojat e njerëzve me programet e OKB-së në Kosovë ndër vite. U ekspozuan gjithashtu fotografi që paraqisnin punën e OKB-së në pjesë të tjera të botës.Aktiviteti i hapjes nisi në Qendrën Barabar, duke mbledhur përfaqësues të OKB-së, partnerë dhe njerëzit, portretet e të cilëve ishin pjesë e ekspozitës. Peter Due, Përfaqësues Special i Sekretarit të Përgjithshëm dhe shef i UNMIK-ut, dhe Stephen O’Malley, Koordinator i Kombeve të Bashkuara për Zhvillim në Kosovë, iu drejtuan të pranishmëve.  “Fotografitë që shihni jashtë nderojnë njerëzit dhe partneritetet që janë në qendër të punës së OKB-së”, tha Due. Ai i falënderoi personat e paraqitur në ekspozitë që ndanë rrëfimet e tyre dhe punuan krah për krah me OKB-në për të përmirësuar jetën e njerëzve. Ai vlerësoi gjithashtu partneritetin me Qendrën Barabar në ndërtimin e besimit dhe mirëkuptimit ndërmjet komuniteteve.“Puna jonë ndihmon në ndërtimin e sistemeve më të forta shëndetësore dhe arsimore, në promovimin e barazisë gjinore, sundimit të ligjit, qeverisjes së mirë, sistemeve të drejta të punës dhe mundësive për punësim të denjë”, tha Stephen O’Malley, Koordinator i Kombeve të Bashkuara për Zhvillim në Kosovë.  Mes portreteve ishte edhe ai i Predrag Mitic, i cili u kthye në Kosovë me familjen e tij në vitin 2024, pasi ishte zhvendosur në vitin 1999. Përmes programit të saj për Kthim dhe Riintegrim, Organizata Ndërkombëtare për Migracionin (IOM) e mbështeti Andjelën, vajzën e Predragut, në zgjerimin e shërbimeve të saj të manikyrit dhe pedikyrit dhe në përmirësimin e jetesës së familjes. “Me mbështetjen e IOM-it, shpresa jonë është të ndërtojmë një biznes familjar të qëndrueshëm dhe një të ardhme më të sigurt së bashku”, tha Mitic.  “Për familjet që kthehen në shtëpi, një burim jetese mund të bëjë dallimin mes nisjes nga e para dhe ecjes përpara. Roli ynë është të ndihmojmë që ky fillim i ri të kthehet në një mundësi të qëndrueshme”, tha Marian Benbow Pfisterer, shefe e Misionit të IOM-it në Kosovë, e cila vizitoi ekspozitën.Duke shënuar 81-vjetorin e themelimit të Kombeve të Bashkuara, ekspozita bashkoi rrëfime personale për punën e OKB-së në Kosovë, duke u ofruar vizitorëve mundësinë ta njohin këtë histori përmes njerëzve që kanë qenë pjesë e saj.Artikulli u publikua fillimisht në faqen e IOM-it në Kosovë: Ekspozita për Ditën e OKB-së vë në pah njerëzit që qëndrojnë pas punës së saj në Kosovë.