Të rinjtë zdrukthëtarë që gdhendin të ardhmen e tyre të suksesshme

Puna e afërt me të rinjtë e Kosovës, përmes nismave si zhvillimi i aftësive dhe programeve të trajnimit praktik, është çelësi për integrimin e tyre të qëndrueshëm në tregun e punës.

Dhjetë muaj më parë, Arsim Gashi, një mjeshtër 32-vjeçar, nisi rrugëtimin e tij në kompaninë ‘Woodtec’ në Janjevë, duke mësuar të ndërtojë një shtëpi prej druri nga themeli. Si ndihmës mjeshtër, ai kaloi nëpër të gjithë procesin e ndërtimit, duke siguruar që gjithçka të shkonte sipas planit.

Tani që shtëpia është pothuajse e përfunduar dhe gati për eksport, ai reflekton mbi zhvillimin e tij profesional dhe aftësitë e fituara:"Gjithmonë më ka interesuar puna me dru, por nuk e kuptoja sa disiplinë kërkon për të mësuar të gjithë procesin. Sot, kam aftësitë për të ndërtuar një shtëpi nga fillimi deri në fund," thotë ai.

Në vitin 2023, projekti "Trashëgimia kulturore si nxitëse për rilindjen ekonomike të Janjevës", i financuar nga Bashkimi Evropian në Kosovë dhe Ministria e Kulturës, Rinisë dhe Sportit, dhe i zbatuar nga UNDP, përfshiu një trajnim gjashtëmujor praktik për gjashtë të rinj të komuniteteve të ndryshme në fushën e zdrukthëtarisë dhe përpunimit të drurit. Për shkak të interesimit të madh nga pjesëmarrësit dhe nevojës së kompanisë për punonjës, trajnimi u zgjat edhe për gjashtë muaj të tjerë, deri në maj 2024.

Remzi Shabani, një i ri tjetër nga Janjeva, iu bashkua programit pa asnjë përvojë të mëparshme në përpunimin e drurit. Përmes kësaj mundësie, ai realizoi dëshirën për të mësuar këtë profesion unik përmes praktikës direkte.

"Disa javë më parë, isha në Gjermani me kolegët e kompanisë për të dorëzuar dhe montuar një shtëpi. Është interesante se si pas vetëm 10 muajsh angazhimi këtu, mund të asambleoj një shtëpi," thotë Remziu.

Megjithëse e ka shijuar përvojën e punës jashtë vendit, ai planifikon të vazhdojë karrierën e tij në vendlindje dhe të kontribuojë në mirëqenien e familjes së tij.

Angazhimi dhe përkushtimi i praktikantëve janë vazhdimisht të vlerësuara nga Nexhmedin Kryeziu, mjeshtër zdrukthëtar, i cili ka qenë pranë tyre që nga dita e parë si trajneri i tyre. Ai vë në pah përkushtimin e tyre ndaj punës dhe respektin që tregojnë për njëri-tjetrin.

“Ata duhej të mësonin gjithçka nga e para, duke përfshirë dhe montimin përfundimtar të shtëpive, dhe shikoni ku janë tani – pothuajse po i kryejnë të gjitha detyrat në mënyrë të pavarur”, shpjegon Nexhmedini.

"Më kujtojnë kohët e vjetra, kur isha i ri dhe i përkushtuar për të mësuar çdo detaj të këtij zanati. Edhe unë e nisa punën në industrinë e drurit në biznesin e mobilieve të familjes sime kur isha vetëm 18 vjeç," thotë Kryeziu me nostalgji.

Simbad Latifi, një tjetër trajner që i ka udhëhequr të rinjtë gjatë gjithë procesit, shpreh krenari për progresin dhe pasionin e tyre për këtë zanat. Ai sheh jo vetëm punëtorë të aftë tek ta, por edhe mjeshtër të ardhshëm që do të lënë gjurmë në botën e zdrukthëtarisë.

"Është frymëzuese se si, edhe pas kaq shumë vitesh pune me dru, ka ende gjëra për të mësuar nga këta të rinj. Krijimtaria dhe teknika – këto janë përbërësit magjikë të këtij zanati," thotë Simbadi, duke reflektuar mbi natyrën gjithmonë në zhvillim të përpunimit të drurit dhe inspirimin e pafund që ai ofron.

Qëllimi i trajnimit praktik është t’i pajisë të rinjtë me aftësi të avancuara në zdrukthëtari, duke i bërë ata të kualifikohen si profesionistë të ardhshëm në këtë fushë të çmuar dhe fitimprurëse.

Muhamet Latifi, një 21-vjeçar pjesëmarrës në trajnim, reflekton mbi rrugëtimin e tij, nga ditët e para kur nuk dinte si të përdorte mjetet e punës. Me ndihmën e trajnerëve, ai u adaptua shpejt, fitoi aftësi dhe, së bashku me kolegët e tij, krijoi kujtime të paharrueshme të transformimit të tij profesional.

Nga ana tjetër, Erand Konxheli, një i ri ambicioz, shprehet:
"Gjithçka po shkon shkëlqyeshëm; po mësoj gjëra të reja dhe po përmirësohem çdo ditë. Qëllimi im përfundimtar është të hap biznesin tim, ku do të specializohem në ndërtimin e shtëpive të vogla prej druri," thotë ai, duke shprehur entuziazmin për të shndërruar aftësitë e tij në një biznes fitimprurës.

Ermal Qose, drejtori i prodhimit dhe bashkëpronari i ‘Woodtec’, thekson rolin e rëndësishëm që kanë luajtur këta gjashtë të rinj në përmbushjen e kërkesave të kompanisë për prodhim, për shkak të ngarkesës së punës dhe diversitetit të produkteve.

"Jam i kënaqur të shoh se sa larg kanë arritur. Të gjithë janë shndërruar në ndihmës mjeshtër të aftë dhe shumë shpejt do të bëhen zdrukthëtarë profesionistë," thotë Ermal.

Ai shton se Woodtec ka planifikuar të mbajë të gjithë gjashtë praktikantët edhe pas përfundimit të trajnimit praktik, duke siguruar një angazhim të qëndrueshëm dhe afatgjatë.

Ndërsa UNDP Kosova feston 25-vjetorin e saj këtë vit, reflekton mbi ndikimin e rëndësishëm që ka pasur ndër vite në mbështetjen e banorëve të Kosovës përmes programeve dhe iniciativave të shumta zhvillimore.

UNDP dhe Bashkimi Evropian janë partnerë afatgjatë prej 20 vitesh, të udhëhequr nga vlerat e përbashkëta të Kartës së OKB-së dhe objektivave të ngjashme për paqe, siguri, të drejtat e njeriut dhe zhvillim.

Storja e shkruar nga: Mimoza Kqiku

Photografitë: Xhemail Sllovinja & Mrinë Godanci

Shënim: Kjo storje është publikuar fillimisht në faqen UNDP Kosovo Exposure UNDP Kosovo Exposure. Ajo është ripublikuar këtu dhe është bërë e qasshme në gjuhën shqipe dhe serbe.